Prishtinë, 16 mars 2025 – U mbajt Kuvendi i Rregullt i Odës së Ndërmjetësuesve të Kosovës, ku Kryetarja e Odës, Ganimete Xhelili prezantoi raportin vjetor për vitin 2024, duke reflektuar mbi të arriturat dhe sfidat që kanë shoqëruar punën e ndërmjetësuesve gjatë këtij viti.
Në këtë takim, u theksua progresi i vazhdueshëm i ndërmjetësimit në Kosovë si një mekanizëm efektiv për zgjidhjen e mosmarrëveshjeve. Falë bashkëpunimit të ngushtë me institucionet dhe partnerët, si dhe angazhimit të anëtarëve, ky vit solli rezultate të prekshme në fuqizimin e profesionit dhe promovimin e ndërmjetësimit në sistemin e drejtësisë.
Gjithashtu, Kuvendi miratoi Planin e Punës dhe Planin Buxhetor për vitin 2025, të propozuar nga Kryetarja e Odës, duke vendosur prioritetet dhe drejtimet kryesore për avancimin e mëtejshëm të ndërmjetësimit në Kosovë.
Kryetarja e Odës vlerësoi mbështetjen e Bordit dhe përkushtimin e anëtarëve, të cilët me profesionalizmin dhe angazhimin e tyre vazhdojnë të kontribuojnë në forcimin e ndërmjetësimit dhe të vetë Odës së Ndërmjetësuesve.
Përpara mbeten sfida, por me punë të përbashkët dhe përkushtim, ndërmjetësimi do të vazhdojë të zërë vendin e merituar në sistemin e drejtësisë në Kosovë.
