𝐎𝐝𝐚 𝐞 𝐍𝐝ë𝐫𝐦𝐣𝐞𝐭ë𝐬𝐮𝐞𝐬𝐯𝐞 𝐭ë 𝐊𝐨𝐬𝐨𝐯ë𝐬 𝐧ë𝐧𝐬𝐡𝐤𝐫𝐮𝐚𝐧 𝐦𝐚𝐫𝐫ë𝐯𝐞𝐬𝐡𝐣𝐞 𝐦𝐞 𝐃𝐡𝐨𝐦ë𝐧 𝐊𝐨𝐦𝐛ë𝐭𝐚𝐫𝐞 𝐭ë 𝐍𝐝ë𝐫𝐦𝐣𝐞𝐭ë𝐬𝐯𝐞 𝐭ë 𝐒𝐡𝐪𝐢𝐩ë𝐫𝐢𝐬ë 𝐩ë𝐫 𝐧𝐣𝐨𝐡𝐣𝐞𝐧 𝐫𝐞𝐜𝐢𝐩𝐫𝐨𝐤𝐞 𝐭ë 𝐥𝐢𝐜𝐞𝐧𝐜𝐚𝐯𝐞 𝐭ë 𝐧𝐝ë𝐫𝐦𝐣𝐞𝐭ë𝐬𝐮𝐞𝐬𝐯𝐞

Tiranë, 26 nëntor 2024 – Kryetarja e Odës së Ndërmjetësuesve të Kosovës, Ganimete Xhelili, dhe Kryetarja e Dhomës Kombëtare të Ndërmjetësuesve të Shqipërisë, Drita Avdyli, nënshkruan Marrëveshjen Teknike për njohjen e licencave të ndërmjetësuesve.

Me këtë rast, Ministri i Drejtësisë në Shqipëri, Ulsi Manja, dhe Ambasadorja e Austrisë në Shqipëri, Monika Zach, theksuan rolin jetik të ndërmjetësimit në mbështetje të sistemeve të drejtësisë.

Ceremonia u mbajt në Zyrën e Kryeministrit, COD – Qendra për Hapje dhe Dialog në Tiranë, me praninë e shumë mysafirëve të shquar, përfshirë Zëvendësministrin e Drejtësisë në Shqipëri, Klajd Karameta, Ambasadorin e Kosovës në Shqipëri, Skënder Durmishi, Drejtorin e Drejtorisë së Ndihmës Juridike Falas, Ergys Qirici, Kreun e Zyrës Rajonale të Bashkëpunimit për Zhvillim të Austrisë me bazë në Tiranë, David Muckenhuber, si dhe ndërmjetësues nga të dy vendet.

Ceremonia u organizua nga projekti “Zgjerimi dhe Fuqizimi i Sistemit të Ndërmjetësimit në Shqipëri,” i zbatuar nga CSSP në partneritet me Odën Kombëtare të Ndërmjetësuesve të Shqipërisë, Fondacionin Shqiptar për Zgjidhjen e Konflikteve dhe Ministrinë e Drejtësisë, me financim nga Agjencia Austriake për Zhvillim.

Kjo marrëveshje përbën një moment historik për zhvillimin e ndërmjetësimit në rajon, duke shënuar hapin e parë drejt krijimit të standardeve të përbashkëta dhe lehtësimit të ushtrimit të këtij profesioni në të dy vendet.

Përkushtimi dhe vizioni i kryetareve Xhelili dhe Avdyli për këtë finalizim janë dëshmi e vullnetit të tyre për të nxitur iniciativa të reja bashkëpunimi që forcojnë lidhjet ndërmjet Kosovës dhe Shqipërisë, duke kontribuar kështu në fuqizimin e ndërmjetësimit dhe mirëqenies së qytetarëve.